Туѓината пуста да остане

Печалбарите се вратија, само нејзиното либе не. На третата година пишува дека се оженил со друга.

Туѓината пуста да остане,
Таа од либето ме раздели.
Таа од либето ме раздели,
Што го љубев време три години.

Сите печалбари си дојдоа
Само мојто либе не се врати.
Ќе ве прашам млади печалбари
Дали го видовте мојто либе.

Дали го видовте мојто либе
Од печалба дома да си иде?
Дење ноќе на порти го чекам
Везден плачам и на него мислам.

На трета година писмо прати
И ми пише нема да се врати.
Не се враќа друга си заљубил
И за неа тој си се оженил.